عبير المهيدب

عسسسسللل!! بالبدايه بتخرشكم بجديتها و تعطيكم قوانين بس سممحه سمحه و متعاونه شرحها مره حلو و لها تجميعات للميد جا منها شوي و طريقتها وجهين اختياري و انتي تختارين صفحه وحده بس تنبهك عن اغلاطك فيها مستوعبين! مين يسويها ذي انقذتنا الله يسعدها و يووفقها الفاينل من القسم مو منها و البونس عندها اسهل شي شاركي بس و تضمنين ال A+

عسسسسسسسسسسسسسل افضل وحده تشرح عرب وتوصلك المعلومه وتكب البونس كب، اي شي تسوينه تاخذين بونس ولو اعتذرتي عن المحاضره ماتحطك غياب مره متعاونه وسلسله والميد حقها دايم يتسرب ذاكرو زين لان العرب دسم بس الدكتوره عسل مره نزلت معاها مره ثانيه عرب١١٨

الدكتورة عسل مره الشرح تشرح بذمة وضمير شرحها رهيب وتحل معك تمارين الدرس ، سمحه مره من ناحية انها تأجل الكلاس اذا كان فيه ميدد بس اذا فيه محاضره تاخذ الحضور واختباراها الميد كان حلو كان عباره عن ورقتين وقالت اختارو ورقه اعلمكم اخطاءكم رهيببببه لو ما قالت كان طيرت قريد عسللللل بس مشكلتها الوحيده كل اسبوع واجب والمحاضره تاخذهااا كاملههه خصوصاً كان وقت المحاضره بعد الظهر في كانت طاقتي صفر وتعطي بونس

عبير معروفة ملكة وبس احبهااا تبين نصيحتي ياللي تقرين؟ اختاريها وربي إنها أسطورة وترش البونس رش ملكة

تتأخر عن المحاضره نادر تجي على وقتها وتاخذ المحاضره كلها ما افهم على شرحها صراحه بس شاركوا قد ما تقدرون تعطي عليها بونس ونصيحه لا تصيروا ليدر تكرفكم ما تسوى عليك الـ 3 درجات وغيرك يأخذ اكثر من المشاركة اما الميد مو سهل مره بس تساعدكم تخليكم تختارون وجهه وتقول لكم فيه أغلاط او لا و أيام الميدات كانت عادي تسمح تخليها لنا اونلاين و تهاوش كثير مدري ليه وعلى أيش

الدكتوره مره عسوله شرحها صراحه مره مره كويس ولو ركزتي تفهمين مره زين واعمال السنه تدقق عليها كثير بس تعطيكم فرصه تعدلون بالنسبه للتعامل الصراحه مزاجيه شوي يمكن تعصب عليكم وباول محاضره اعطتنا شروط و اوامر كثير وخفنا بس لاتخافون تراها طيوبه ومع الوقت تلين التحضير مرن يعتبر بس تركز عليه مره المهم انها تدف مره مره والميد كان جدا سهل وساعدتنا فيه الله يسعدها انصحكم فيها

عسل وبس

مره عسل ومتعاونة بس مزاجية شوي تعصب بس تحن علينا على طول وبالبرزنتيشن تعبتنا شوي كل شوي تطلب نعدل عليه وعطتنا ٥ إلى ٦ واجبات بس شرحها ممتاز وتكبكب بونسات، تحب التفاعل بكلاسها مره ما تحب الكلاس يكون نايم ومحد يشارك، تعاونت معنا بآخر فترة قبل الفاينلز وخلت الكلاسز عن بعد، طولت معنا ما خلصت الا قبل الفاينلز باسبوع وهي لسا تحل معنا تمارين الميد كان مره مقدور عليه بس طبعًا لازم مذاكرة زينة ودقيقة، بالميد تمر عند وحدة وحدة تقولها اختاري صفحة وحدة انبهك على الاغلاط اللي عندك، تنبه بس ما تعلمك وش الصح

افضل دكتوره عرب بلا منازع تصب البونص صببب المحاضر احيانه تخليها اون لاين اذا طلبنا وشافتنا منضغطين من الاختبارات

عسللللللل تشرح من قلب وتحاول تفهمون قد الامكان حصتها ممتعه بس ما تحب التأخير ومسكة الجوال تحب اللي يشاركون معها وتساعدهم وتعطي بوووونننسسس كثييييير مره عسل ومتعاونه لا تترددون تاخذون عندها

تصب الدرجات صببببب شديدة شوي بالتحضير لكن تعطي بونس للحاضرين و تخلي المحاضرة اونلاين وقت ما طلبنا تعاملنا معاملة ابتدائي الصدق لكن دامها تكب درجات علينا انا راضية اختبارها سهل و بالميد متساعدة جدا و صححت لنا الورقة بساعتها واجباتها كثيرة صراحة تعطي ٣-٤ لكن كل واحد حول ال١٠ صفحات بس كان واحد منهم عليه بونس فقط

اول شي هي بتروعك وتعاملكم معامله رابع ابتدائي عشان تاخذون الماده جد وفعلا تحتاجون ذا الشي لان الماده دسممه بشكلل لازم تفهمون اول باول اذا طلبنا تصير المحاضره اونلاين بسبب اختبار توافق بس اطلبوا من بدري اذا اعطيتيها عذر قبل ما تغيبين نا تحسب لك الغياب اذكر عذري كان عندي ميدين اليوم بعده وكانت المحاضره اونلاين ولا حسبت لي الغياب تمشي على مزاجها حل الواجبات الغلط وتدري اذا انتِ حاله او ناقلته شرحها مررره يبسط الماده وسهل تتذكرينه المحاضره ثقيله لانه اعراب بس اذا سألتكم نوقف هنا قولوا ايه وتوقف

مبدئيا الماده خلقه صعبه ودسمه ولكن مع شرحها سهلته جدا وتشرح من قلب وضمير يمكن اول كلاس تخافون نفسي وترتاعون من كميه المنهج بس عادي ترا اختبارها تاااااااااااااافه وتقدرون تجمعون بونسس براحه توصل لين ١٠ درجات بونس بس ماتدخله بالفاينل وتحب الي يشارك يعني ركزو بذي النقطه وتراها تعرف وتلاحظ الي مايشاركون بعد انتبهو

كثير ناس يمدحونها لكن اشوفها عادية اعمال السنة الميد كان رائع وتساعد بشكل وفيه بونس تعطيكم على مشاركتكم الواجبات كانت كل اسبوع حتى اسبوع اجازة فيه واجب كانت تخلي الكلاس اون لاين لو صار عندنا اختبار ونبغا نذاكر التحضير على حسب مزاجها مره تاخذه بعد بداية المحاضرة ومرات م تاخذ خير شر البونس اللي باعمال السنة ماتدخله بالفاينل ابدد حتى لو عندك كثير

الصراحه الله حق اختباراتها سهله وحليوه و تساعدك وتعطيك بونس بس تقهر يعني أنا كنت مجمعه بونس و ما كنت ناقصه كثير بأعمال السنه و نقصت بالفاينل وما دخلته على الفاينل يعني انخسفت قريد وانا كنت بالراحه اقدر اجيب القريد اللي بعده لان عندي بونس كثير يعني ما ساعدت بالفاينل عكس الدكاتره الباقين

اسطورية بمعنى الكلمة اولا واهم شي اخلااااق ثاني شي البونس عندها في اعمال السنه زي السلام عليكم لدرجة الحضور احيانا عليه بونس كلشي تسوينه عليه بونس في الميد مافي اسهل من اسئلتها لانها تكون قايلتها لك وقت المحاضره اقول بجيب زي كذا والاختبار تختارين صفحه تعلمك اغلاطك فيها مستحيل شخص ما يجيب كامل في اعمال السنه عندها

محاضرتها ثقيييلة لان المادة بكبرها ثقيلة، تشرح لك الاساسيات من البداية حتى اللي مو بالكتاب لانك ما رح تفهمين الكتاب أصلا بدونها. الميد عسسل كانت تمر علينا وحدة وحدة وتشوف (كل إجاباتك) واذا عندك غلط تقولك. البونس كانت تقسمنا مجموعات والمجموعة الي عندها نقاط اكثر يعني يحلون اكثر يأخذون بونس اليوم. وبكل مرة لازم نسوي مجموعة غير عشان عالاقل كل بنت يكون معها بونس واحد

اتوقع ما يحتاج اكتب عنها الكل يعرفها ملكة العرب الله يسعدها يسره ومتفاهمه ❤️

الصراحة كتكوته ومعطاءه مرة

الميد سهالات وتساعد فيه التكاليف سهله كان عرض كانفا بس وواجبات نصورها ونرسلها لليدر سوت لي اب قريد المحاضرات تخليها اون لاين

ممتازة بالدرجات وتسهل المادة جدًا جدًا . بس كانت موزعتنا نسوي عروض للدروس وماكان واضح طلبها ايش نسوي بالعرض وماكان يعجبها لما نسلمه شوي اسلوبها مو افضل شي .لكنها الافضل بتوزيع الدرجات و قريدات الشعبة كانت حلوووه مره

عبير المهيدب كنت متخوفه بالبدايه بأول كلاس لها كانت مره صارمه وتقول ترا الماده يبيلها جهد وكذا بس الله يسعدها الميد مافي اسهل منه وتعطي بونس بالهبل والفاينل إذا ناقصه درجتين على قريد تدفك الله يسعدها يارب فعلا سهلت لنا المادة🫶🏼🫶🏼🫶🏼

افضل دكتورة فيك يالعرررب😍 اي مقرر عرب ماسكته نزلوه عندها بدون تفكير تساعدك وتعطيك بونس وتشرحلك اكثر من مره وتوصل المعلومه بشكل بسيط وسلس جداً وتدفك قد ماتقدر عسل، انزل عندها مليييييون مره

مره مره مره تهتم للمشاركةوتحط عليها بونس عادي يوصل 7-8 درجات كل شي تمام بس كان وقت محاضرتها ثقيل

حليوه بالنسبة للتكاليف بداية الترم خيرتنا بين اختبار او نسوي عرض وهي الي تشرحه وكان فيه اتوقع ٥ واجبات سهلة تمارين الكتاب، وللامانة شرحها مرة حلو ويفهم، نظامها تقسمكم قروبات واكثر قروب يشارك ياخذون بونس واحد، وبعدين صرنا اونلاين واكثر بنت تشارك تاخذ درجتين وكانت دايم تكنسل اخر لحظة ما خلصنا المنهج الا قبل الفاينل بكم يوم، يعني الي يحب يشارك ينزل عندها وهو مغمض، واختبارها موب صعب وكان عندها حركة تدور على البنات تختارين صفحة من الاختبار تعلمك وش الاسئلة الي غلط عندك عشان تعدلينها(الاختبار صفحتين)

تجنن تجنن تجنن بدايه الترم بتعطيكم لسته قوانين و كلها ماراح تطبق منها شي الله يسعدها😂💗💗💗شرحها فوق الخيال بس ركزوا معها و تبسط الماده تحب اللي يشارك معها و يتفاعل و تتعاون معه حتى لو غلطتي عادي ياخي وسيعه بال ما تفشلك، تكاليفها اللي سويناها كانت مشروع و واجبات و تعطي بونس لكن فكرته كل نهايه محاضره تنقسمون مجموعات و اكثر مجموعه تجمع نقاط بتاخذ بونس

تجنن صراحه مره الله يسعدها ويوفقها وين ما كانت

اخذت معها عرب ١٠١ شرحها حلو لكن سرريع وفوضوي ولازم تسجلين كل شي معها واذا فيه شي مو فاهمته ارجعي لليوتيوب م يكفي شرحها الاختبار كان نص نص اللي فاهمه بتحل باختصار اما التعامل مو مره يمكن البنات يحبوها عشان تضحك معهم لكن بالنسبه لي تعاملها معي سيء رغم انو ما حصل اي شي مني طبعاً الدرجه جبتها باجتهادي فقط.

الدكتوره عسل وشرحها 💯 اول مرا افهم العربي كذا انصحكم تنزلون عندها كلاس ساعتين كأنه خمس دقايق وتشرح لك المعلومات بشكل واضح وسهل الواجبات تعتبر قليله لكن دقيقه بوقت تسليمها الميد كان سهل للي يذاكر زين الماده ممتعه والدكتوره شرحها ممتاز 👌🏻

خيااالللييه مرره متساهله معنا واختبارتها من الشرح

أفضل دكتورة فيك يا سعود❣️❣️❣️

الله يسعدها ويسهللها كل أمورها مثل ما سهلت علينا الماده الدكتوره شرحها واضح جدا وتعطيكم أمثله كثيره وما تروح للنقطه الثانيه إلا إذا الكل فاهم ما قصرت بالشرح ما قصرت باي شي افضل دكتوره مرت علي بالجامعه الله يسعدها وين ما كانت

الله يسعدها ووفقها وييسر أمورها يارب🤍 اقسم بالله المادة هذي كانت عقده بالنسبه لي كنت حاذفتها الترم الي فات وهذا الترم اخذتها عند الدكتوره عبير، من ناحية الشرح افضل واحسن شرح تشرح لك الماده حتى لو انك مو متأسسه، التكاليف واضحه وسهله وتعطيك مدة طويله عشان التسليم، متعاونه بالتحضير ، التعامل ولا غلطه فعلا الله يسعدها، واخيرا والاهم الدرجات ما قصرت تعطيك حقك واكثررر.

كان كلاسها دايم يصدع راسي وثقيل ولكن الشكوى لله هذا المنهج وهي حاولت قد ما تقدر تخلينا نفهم، ما حسيت بفضلها بعد الله إلا وقت مذاكرة الميد والفاينل ودخلت الاختبار وانا فاهمة الحمدلله 💘💘 تحب تشرح بالسبورة، وتحل كل الانشطة معنا بحيث يكونون كل 5-6 بنات مجموعة ويشاركون والفريق الفائز كله ياخذ بونس (هالحركه تسويها بكثير كلاسات فتقدرون تجمعون بونس واجد بس حسب كلامها ما يدخل بالفاينل "فعاد انتم تاكدوا")

الله يسعدها سهلت علينا الله يسهل عليها

عسل الله يوفقها ويسعدها يارب

صراحه مره استغرب من اللي عجبتهم بس بتكلم من ناحيتي ، هي كـ شرح كويس وزين لكن تحتاج مصدر ثاني و اكتبوا معها لانها تجيب اللي بيجي بالميد والفاينل ، لكن تعامل و حساب الدرجات ما عجبني ابدًا ، النظام كان مجموعات واللي يجمعون اكثر نقاط ومشاركه لهم بونص ، وقلت خلاص أنا الحين ضامنه كل شيء ! يوم جاء ليلة الاختبار حسيت فيه ظلم بحسبة أعمال السنة + ما حسيت انها دفتني بالفاينل .. انزل عندها ثانيه؟ لا لكن إذا انحديت ممكن

هي عسل وشرحها واضح ودقيقة شوي بالعرض، مشكلتها انها تقول شيء وتنساه عشت معها بتوتر بس بالأخير عسل

تراها عسل نزلت لي غصب بس كويسه شرحها حلو وتشرح بذمه وضمير الميد حقها اسهل ميد اختبرته بس اسلوبها وطريقه كلامها حمد لله وشكر غريبه

عسل عسل عسل كنت متخوفه شوي بالبدايه لان عرب 101 اصعب من عرب 100 بس والله مع شرحها فهمت وتوصل المعلومه ولطيييفه اذا مافهمتي عادي تعيد لك ثلاث مرات لين تتأكد انك فاهمه والله يجزاها خير ويكتب أجرها ويسعدها زي ما أسعدتنا وفرفوشه وخفيفة دم ماتطفشون بكلاساتها الحضور : تركز وماتحب احد يتأخر الدرجات: تعطي بونس وتحب المشاركات الماده : يبي لها جهد , حاولوا تحلون التجميعات قبل كل اختبار وبتضمنون درجتكم إن شاء الله

الله يسعدها ياربب مدري اتكلم عن شرح ولا اسلوب عسللل عسللل مرا سهلت علينا المقرر من شرحها و تتأكد انك فاهمه قبل تطلعين الله يوفقها يارب وين ماكانت ويسعدها 🤍🤍🤍

تجننن اول مره افهم عرب منها بس اتبعي على الكلام الي تقوله وتكتبه في الصبوره وفالك A+

الدكتورة تجنن مريحتنا طول الترم حتى وقت المذاكره ما اتعب لاني ما اطلع من عندها الا وهي مفهمتنا زييين وحريصة على درجاتنا مره. اهم شي تكونون كويسين معها وتشاركون من البداية. الله يسعدها من افضل الدكاترة🤍🤍

كلاسها ثقيل وطويل صراحه لكنها عسسلل ادببب وتفهممم اموت فيها الميد جاء مره مره سهل وساعدتنا بالميد مرت علينا وحده وحده قالت لنا اذا عندنا اخطاء والاشياء اللي تكتبها بالسبوره مهمه مرهه تجيب منها وساعدتنا سوت اب قريد على كلام البنات انهم اخذوا اعلى من توقعهم تجنن مره الله ييسر لها ويسهل امرها زي ما سهلت علينا

قسم بالله 🐐🐐🐐🐐🐐🐐 قسم العربي ياناس والله تاريخية هالدكتورة اشي تعامل اشي بونس اشي اختبارات سهلة ، انا انسانه من كثر كرهي للمادة وفشلي بالعرب حذفتها بترمها واخذتها مره ثانيه مع عبير وقسم بالله صرت اعاملها معاملة سلم ، الله يسعدها ويوفقها وين ماتروح 🙏🙏🙏🙏🙏🙏🙏🙏

دكتورة عبير ان كنتي تقرين كلامي جعلك بالجنة يااارب ووالديك، وش اقول بس وش اخلي وه عسل عسل ومتعاونة وتقدر وتراعي وتشرح من قلب وفرفوشة يكفي يكفي والله اليوم كان الميد على اني متخووفة جدًا من العرب واساسي فيه مش ولا بد الا اني حليت والله يا دكتورة عبير ان ما انساك من دعائي لادعي لك ان الله يسهل امرك مثل ما سهلتي علينا

يارب الله يوفقها ويسعدها وتيسر امرها وتدخلها الجنه يارب صدقق الله يسعدها شرحها يجنن وتفهمك صح متعاونة جدا جدا بدعي لها في كل صلاة 🩷🩷🩷

الواحد يتعب وهو يتفشل عن بعض الناس

هي عسل مره مره وتعطي بونس واختبارها سهل وتشرح من قللللب يعني غصب تفهمين، تاخذ اغلب وقت المحاضره

عسل عسل عسل لا تخافون على درجاتكم هي تخاف عليها اكثر منكم

متعاونه بشكللل يوم شافت بنات ناقصين بالميد عطتهم تكاليف يسوونها وعليها كم بونس تتضايق إذا كثر غياب البنات فأعطت اللي ماغابو بونس او اثنين وتقول مستحيل تعطي حرمان

لا تفوتين محاضره بدون عذر اهم شي ثاني شي شرحها الصدق ممتاز جداً جداً واتركوا كل الي بيدكم هي تشرح وتكتب الي تشرحه بالسبوره بعدها تخليكم تصورونه وتشرح زي الكتاب واكثر لان فيه اشياء محذوفه من الكتاب وتجي بالاختبار الصدق اول مره يمر علي احد يعرف يشرح عربي زين وبذمه وضمير الصدق هي حريصة مره مره لاتخافون على درجاتكم معها لان ميدها سهل وشرحها الكل يفهم منه ماشاء الله

تحب الي يركز معها مرره ومحترمه وتعطي بونس ياحلوها عسل عسل المحاضره طويله بس تتعاون مرره وتشرح من قلب ماشاءالله

اكره الاعراب لكن مع الدكتوره عبير سهلت علي الماده بشكل كبير ومتعاونه وحبوبه وحلوه وكل شيي احبها مررره يعني اذا خذيتي معها اضمني الدرجه الحلوه الله يسعدها ويوفقها دنيا وآخرة 🥹😭🤍🤍🤍🤍🤍

عسسسل الدكتوره وتعططيي بونس لاعمال السنه لكن انا جبت العيد بالفاينل

من الدكاتره الي بذكرهم بالخير الله يوفقها ويسهل امرها يارب❤️ ماتقصر معاكم ابد

افضل من يدرّس عرب

بتاخذين عرب ١٠١ نزليها عند دكتوره عبييير واتحداك اذا مافهمتي معها واذا نقصتي ب شيء ركزي بمحاضراتها وكل شيء سهالات معها ، الله يجزاها خير ويوفقها وين ماراحت ، كنت كره النحو والاعراب بس معها تأسست كويس والقريد بالجيب

توني طالعه من الفاينل رغم ان الاختبار مو بهذيك السهوله الا اني قدرت احل بفضل الله ثم شرحها❤️‍🔥 رهييببه لاتتعدونها وركزو معاها

اسطوره اسطوره الله يجعلها بالفردوس الاعلى قد ماساعدتنا بالدرجات ماعندها تكاليف بس واجبات شرحها رهيييب رهيب وتأسسك من الصفر ومارح تحتاجين لمصدر ثاني دكتوره مثاليه من جميع النواحي مارح انساها الله ييسر لها ويحقق لها ماتتمنى🙏🏻

اخذت عندها عرب ١٠١ لو اكتب من اليوم لبكرة ما اوفيها حقها صدق تتعب بالشرح وتأسسك زين بالعربي الحمدلله اني نزلت الماده عندها تهبل تهببببل تساعد ومتعاونة مره ومرنه واختباراتها حلووه وماتعسر على الطالبات خذو الماده عندها وانتم مغمضيييييييين ، دكتورة اذا كنتي تشوفين الله يوفقك ويسهل عليك مثل ماتسهلين علينا ويرزقك اضعاف تعبك🩷🩷

ياشيخه روحي جعلك بالفردوس الاعلى❤️❤️❤️❤️❤️اسطوره العرب الله يسعدها وين ماكانت قسم بالله كان العرب رعبي الاكبر الا ان بفضل الله ثم شرحها فهمت صدق ركزو معها تراها حريصه انها تفهمكم وركزو على الكلام الي تكتبه بالسبوره وبتمشون صدق تخليك تفهمين وتستوعبين وفوقها اختباراتها سهللله والله يوفقها ويجعلها بالجنه البارده مابنساها من دعواتي قد ماساعدتنا وسهلت لنا وخلتنا نتخطى خوفنا من هالماده ماقصرت معنا ابددد

شوفوا اول كلاس بتحاول تثبت شخصيتها وانها قويه وتخوف لكن معليكم ترا عسوله خصوصا بالاختبارات والبونسات انا دفتني دف وبالميد تأشر لك عالسوال الغلط وتراعي ظروفك لو بتاجلين عسووله الصراحه وحبيبه لكن ما انصح تصيرون ليدر عندها مايسوى التعب اللي بتتعبونه على درجتين بونس او ثلاث والدرجتين اوثلاث هذي بتعطيها للكل اساسا وبس والله الله يسعدها في الشرح والتفهم مافيه زيييها🙏🏻❤️

ياحظ الي بياخذ عندها،شرحها جميل وممتع الصراحة طريقة الشرح ذكروها البنات تحت لكن برجع اذكرها، تشرح عن طريق كتابة خريطة مفاهيم في السبورة، نهاية كل شرح تخليكم تصورون السبورة، المادة يبي لها مذاكرة اول باول كون انها نحو ولازم تفهمون الدرس الي خذيتوه عشان تفهمون الدرس الجاي لان الافكار بتكون مترابطة ببعض، تعطي بونس وطريقتها تقسم البنات لمجموعات واعلى مجموعة تشارك تاخذ درجة بونس عشان كذا حضروا قبل وحلوا اسئلة الكتاب، ولا تفوتون كلاساتها الاونلاين لانها تعطي كل بنت بونس على كل سوال جاوبته. الله يسعدها

عسلللل مره يا بنات تفهمك صح مره لدرجة اني بس اركز على شرحها بدون ما اكتب وما احتجت اي مصدر ثاني ابدًا تشرح وهي حابه وتسهل لك مستحيل ما تفهمين معها متعاونة جدًا من ناحية كل شيء اختبار وغيره ولا تشيلون هم الميد تعطي بونس بس (بأعمال السنه) الله يسعدها ويوفقها وين ما راحت❤️❤️❤️

الميد حقها سهل نفس مستوى الي تكتبه بالسبوره فبتخليكم تصورون السبوره بعد كل درس و ذاكرو منه ،تعطي بونص نهايه كل كلاس تسوي مجموعات و المجموعه الي تفوز تاخذ بونص او انك تقولين لها تسوين عرض بوريوينت للدرس او اساله للدرس و تعطيك عليها بونص(البونص بس يكون لاعمال السنه ولا يدخل بالفاينل) ، مرنه باختيار موعد اختبار الميد تقدرين تختبرين بيوم غير شعبتك وكذا و بالفاينل قالت اقدر ازيدكم بس درجه للي ناقصها عن القريد الي بعده درجه

الله يسعدها المقرر صعب بس شرحها سهله علينا وحريصه الكل يكون فااهم مهم تحضرون كل المحاضرات لأنها تشرح من قلب ويسهل عليك المذاكره بوقت الميد الميد كان سهل للي مركز معها بس الفاينل موحد ويحوس ذا المقرر يحتاج دكتوره زيها إذا شفتو اسمها نزلو عندها وبتمشون

شهادتي فيها مجروحه مره متعاونه مع الطالبات وشرحها مافيه زيه صدق تفهمك وتشرح من قلب والميد ماقدرت اختبر في اليوم اللي حددته واختبرتني بيوم ثاني الله يسعدها اسئلتها جداً سهله و واضحه بس الفاينل موحد وخسف فيني الصدق ذاكرووو زين وكان عندي بونس بس ما اضافته لنا بالفاينل 😢

ما احب الاعراب وعندي مشكله معاه من ايام المدرسة بس مع د.عبير الله يسعدها ويوفقها ويفتتح عليها اسئله سهله وشرح ولا غلطه و تعطي بونس وتساعدك تفللين اعمال السنه ما اتوقع في افضل❤️❤️!

عسل بس مشكلتها اسلوبها شوي هاه تحسين كأنه اسلوب معلمات زمان الشديده والي تصارخ وتهاوش ماحبيت ولا الباقي كلهم كويس

اختبار سهل، تفهمكم المادة صححح ولو انها شوي سريعه بالشرح ، وقت المحاضره تاخذه كله، كل محاضرة فيه بونس للقروب اللي جاوب اكثر ، ما احتجت مصدر ثاني للمذاكرة ، كنت الخص وراها شرحها لان كافي ووافي وعشان ما اضطر الجأ لمصدر ثاني بالمذاكره لان اكيد بنسى

كلاسها طويييل بس شرحها حلو وتعطينا كل كلاس واجب وما تدقق بتصحيح الواجبات اذا اغلب اللي حليتيه صح ((ميدها يشفعع لكلل شي الله يسعدهااا ويوفقها ياربب)) اذا ركزتي معها بالشرح اضمن الفل مارك ما تطلعع منه ابددد ابدد

تحسسك ان ماعندك غير مادتها تضغطك ضغط بالواجبات والمحاضرة طويلة مملة وتدقق بالحضور وواجباتها كثيييير كل اسبوع واجب تحسسك ان مادتها اهم مادة وهي عرب

الاختبارات تجميعات يهله وتشرح بتعمق وتفهم بس الكاليف مره كثيرررره كل محاضره تكليف او تكليفين اخذنا اكثر من 5 محاضرات بغير وقتها وفوقها تخصم على اللي ماتحضر المحاضرات الزايده تخلي الليدر تحضر 3 مرات باول ونص واخر المحاضره قالت بعطيكم بونس من عندي لان مايمدي تسوي لنا كويز بس طلعته من عيونا عطتنا مليون واجب وهذا والبونس من عندها مو على الواجبات المشاركه كانت تخلي الكل يشارك و تنادي بالاسماء صراحه مستحيل انزل عندها مره تتعب

تشرح زين و اسئلتها سهله وتسوي كويز للي نقصوا بس محاضراتها طويله وواجباتها كثير

حليلة والله، تحب اللي يشارك مرة وتقبل أي مشاركة المهم تشاركين وتعطي بونس للي متفاعلين معها. أنصح فيها؟ أكيييييد💘💘💘💘